عشق میں رنجِ کشتگاں کی خیر
مانگیے شہرِ گلرخاں کی خیر
بیڑیاں توڑ دی ہیں وحشت نے
اب زمیں کی نہ آسماں کی خیر
ایک طوفان اٹھ رہا ہے یہاں
ناؤ کی خیر، بادباں کی خیر
لبِ دریائے حسن بیٹھے ہیں
آگہی! تیرے تشنگاں کی خیر
شمع روشن رہے محبت کی
رونقِ بزمِ دوستاں کی خیر
شاخِ دل پر ترا ٹھکانا ہے
زندگی! تیرے آشیاں کی خیر
جب خدا ہی نہ سن رہا ہو میاں
پھر کہاں کی اماں، کہاں کی خیر
رہگذارِ جہانِ ہستی پر
چلنے والوں کی، رفتگاں کی خیر
رہنما ہی ہے راہزن آصف
رہرووں کی، نہ کارواں کی خیر
